ممنوع الهزار

ممنوع الهزار!

-اوعي تجرح مشاعري-

وأنا هنا أقصد الحساسية الزيادة قوي قوي اللي حطت علي المسلمين, العرب منهم بالذات, والمش عرب بقوا بيتعدوا منهم, وده طبعا بسبب الغياب التام للنقد الذاتي النابع في رأي الشخصي لكثرة المقدسات.

لو سـأل أحدهم, ما هي مقدسات المسلمين هايحتاج ورق كتير أوي يكتبهم فيه.

فالله بالطبع مقدس لايجوز المساس به من قريب أو بعيد, والقرأن هو كلام الله فلا يجوز المساس به أيضا, ولا حتي علي سبيل البحث......يعني لو باحث غلط وأقترح (لاسمح الله) أن القرأن به بعض الأخطاء اللغوية, أو حتي شكك للحظة في الأعجاز العلمي والتاريخي والسياسي والحربي واللغوي والمنزلي (اللي هي صفات احنا اللي لزقناها فيه زي الأعجاز بتاع عمك زغلول) فسيتم تكفيرة ومش بعيد يتم احلال دمه كمان.

طيب بلاش, الرسول مقدس ولايجوز الكلام عليه بغير المديح, لأ مش كدة بس, ده لا يجوز رسمه. يعني لايجوز تخيل شكل الرسول. ليه, عشان مانعبدهوش طب ما أحنا بنعبده وبنحلف بحياته (مع انه مات) وبنرجو شفاعته يوم لاينفع مال ولا بنون.

نضيف للمقدسات الأحاديث التي تم جمعها بعد وفاة الرسول بسنين عديدة تعدت المائة. وحاول تجيب سيرة أن صحيح البخاري فيه كلام لا يصدقه عاقل.......أولا ستسمع لمحاضرات في الوسائل العلمية الرهيبة التي استخدمها البخاري في جمع الأحاديث حتي أنه كان يمشي بالأيام ليتأكد من رواية من الروايات, أو ممكن تسمع كلام أن ربنا وفق المخلصين ليحفظوا كلام نبيه وتسألهم أنت جبتوا الكلام ده منين محدش يجاوب.

وطبعا ممكن تسمع المقولة الشهيرة بأن أصح كتابين بعد كتاب الله هما صحيحي البخاري ومسلم.

أو ممكن تتهم بأنك منكر للحديث يعني من القرأنيين يعني كافر.

النقطة هنا مش صحة السنة أو الأحاديث, النقطة هنا هي القدرة علي قبول الإختلاف في المبادئ الأساسية. مبدأ الأختلاف والفردية في الرأي غير متواجد بالمرة.

لو أنت في مصر هاتتعامل معاملة دونية, ومحدش هايثق فيك, وابقي قابلني لو حد رضي يجوزك بنته. ولو أنت في السعودية هاتستتاب كام يوم وبعد كدة هاتتقتل.

نرجع لموضوعنا....

الشخص الشجاع الواثق من نفسه مش بيخاف انه ينتقد نفسه, لأن مجرد ادراكه لمشاكله وعرضها أمام الاخرين في الشكل الهزلي هو نوع من أنواع التواضع و هو الخطوة الأولي للتحسن.

لكن العقلية المسلمة تري في نفسها "خير أمة أخرجت للناس" وازاي خير أمة تضحك علي نفسها. يعني جرب انتقد أحد الشيوخ أمام مريديه....يعني انتقد محمد حسان مثلا, هتلاقي الناس مش مصدقة أنت ازاي أصلا بتقول اللي بتقوله ده وكأن الشيخ منزه تماما عن النقد.

أنا مرة كنت بانتقد الشيخ مصطفي حسني ورد عليا أحد الأخوة "أنت ازاي مسلم وبتقول كدة" وكأن مصطفي ده المهدي المنتظر......لأ أنا عشان مسلم بقول كدة.

أفتكر أيام المدرسة كان معايا ولد في الفصل أسمه سيف.....في واحد معانا كان بيشتمه فقاله انت سيف الله المشلول مش المسلول زي خالد ابن الوليد.

الصراحة أنا فاكر ان الأسم ده ضحكني جدا وقتها وضحك عدد من زمايلي كمان.....

المهم, مدرس العربي لما عرف الموضوع ضرب الولد اللي قال كدة وبعد كدة أعطي محاضرة في احترام صحابة رسول الله (مع أن الجملة فيها تطاول علي الذات الالهية أكتر من تطاول علي خالد ابن الوليد)!

طيب بلاش خالد ابن الوليد....جرب كدة اتكلم عن الشيخ شعراوي مع سواق تاكسي مثلا أو مع شيخ الجامع اللي جنبك.

ستفاجأ بأن شعراوي له حصانة رهيبة وكأن كل من عرف الله وتبحر في الدين هو الله نفسه.

المضحك أن انك ممكن تنتقد شيخ الأزهر براحتك وممكن تقول عليه نكت كمان لكن واحد زي شعراوي محصن....شيئ غريب مع أن الأتنين بشر!

الحساسية الزيادة عند المسلمين بتؤدي لأنتشار نظريات المؤامرة وردود الفعل العشوائية:

يعني لما رسام من الدنمارك رسم كاريكاتير للرسول الدنيا اتقلبت. ومظاهرات ومقاطعة وسفارات بتتحرق وانفجارات.......وكل ده علي ايه, علي شوية نقد, نقد عنيف شوية وخارج حدود الأدب بتاعتنا, و لكنه في النهاية مجرد نقد مش أكتر

أظن المشكلة في البطحة المزمنة اللي علي راسنا كمسلمين......دايما في رغبة في الدفاع....حتي لو مفيش هجوم.

وبينيع من البطحة أيضا شعور دائم بالظلم....

يعني الغرب بيحيك لينا المؤامرات من أيام الحملات الصليبية.....مع العلم أن احنا احتلينا أسبانيا وسميناها الأندلس قبل الحملات الصليبية بكتير أوي.

طيب ايه الفرق بقي, هايقولك الفرق هو ان المسلمين بيفتحوا البلاد لنشر دين الحق وإقامة دولة العدل والعلم والإيمان.....وطبعا دي وجهة نظرنا أحنا مش وجهة نظر أي حد تاني. يعني أحنا اللي حكمنا بأن احنا الحق وعايزيين الناس كلها تمشي علي الحكم بتاعنا....ياسلام

لو المسلمين مثلا مؤدبين مع الديانات التانية كنا نقول معلش, لكننا لا نريد حتي أن نعامل الأخرين مثلما نريد أن نعامل

يعني الشيخ يوم الجمعة يسب اليهود أولاد القردة والخنازير والمسحيين اللي بيقول عليهم "النصاري" زي ما هو عايز وبعد كدة ينادي الناس بمقاطعة مجلة روزاليوسف لأن فيها نقدالفكرة دولة "الاسلامية". بالنسبالي ده تناقد واضح ومقزز

ولكني ارجع وأفكر, طيب ما القرأن كله انتقاد لمن عبدوا العجل وحرفوا وألفوا ولمن ذبحوا الناقة ولمن عبدوا اللات والعزي ومناة الثالثة الأخري.....المشكلة أن أحنا ننتقد أه, غيرنا ينتقد لأ والف لأ, هنحرق السفارات وهنقاطع المنتجات وهنطالب بإعتذار رسمي.....والأمثلة أكثر من أن تعد.

المشكلة اللي باتكلم عليها ممكن نشوفها في معظم الردود علي موضوعات البلوج وهانشوفها في الردود علي الموضوع ده.